زومار آییننین سون گونلرینی یاشاماقدایام. گوز( پاییز) گلیب چاتماقدادیر.

جانیم هله قیزینمامیش گوزون سویوقلوغونو دوشونرکن، توک ریم بیز بیز( من

دئیرم میز میز) دورور. بونا باخمایاراق من گوزو  اوبیری موسیم لردن داها

چوخ سئورم. نده نینی یاخجی بیلمیرم. بلکه بو موسیم بوللوق اولور یا بونا

خاطیر دیر کی یایین بیر انتی( یکنواخت) گونلریندن منیم کیمی بئزن  بیر

شخصه تکجه گوزون رنگلی سیماسی چاره اولا بیلر.

بیرلیکده دوعا ائدک:

اوجا اوجا داغلاریمیز ییخیلماسین

آمین آللاه

گئنیش سریلمیش کؤلگه لیکلریمیز پوزولماسین

آمین آللاه

گؤر آخان سولاریمیز قوروماسین

آمین آللاه

تانری وئرن اومودوموز اوزولمه سین

آمین آللاه

تارنی بیزی اؤله نه دک هیئچ کیمسه یه موحتاج ائله مه سین.

آمین آللاه

آغ آلنینان ایکی رکعت ناماز قیلدیق قبول اولسون

آمین آللاه

آغ ساققال  آتالارمیزن یئرین جنت اولسون

آمین آللاه

 آغ بیرچکلی آنالاریمیزین یئرن اوچماق اولسون

آمین آللاه

تانری گوناهلارمیزی، آدی گؤزل اولان، محمد(ص) باغیشلاسین.

آمین آللاه

تانری بیزیم دوعالاری قبول ائتسین.

آمین آللاه

سایین زیارتچی لر!!!

 نئچه گون اولار نت دونیاسیندا وئبلوقلار آراسیندا بیر یاریش باشلانیب.

گئجه وئبلوقودا بو یاریش دا ایشتیراک ائدیبدیر.

اگر وئبلوقون یازیلارینی دیرلی گؤرورسوز آشاغیداکی آدرسده بو وئبلوقا اوی

وئرین

یاریش دا اوی وئرین

چوخ ساغولون

بیر گون بیر بالتاچی( مشه دن اودون یاریب گتیرن) مشه ده بیر آسلان گؤرور. آسلان بالتاچی یا دئییر: گل منه قوناق اول.

بالتاچی قبول ائدیر و بیرلیکده اوتورورلار خانین دورسینه. یئمک یینده بالتاچی گؤرور اسلانین آغزیندان ایی گلیر، آسلانا دئییر:

 اصلان بی سنین آغزیندان ایی گلیر. بیر آز او یانلیق دور. بو سؤز آسلانین اوریینه دییر.

دوروب بالتاچی یا دئییر:

 گؤتور بالتانی و وور منیم باشیمدان.

کیشی قورخور. دئییر

 نیه ووروم آخی؟

اصلان غضبلی دئییر :

 وور یوخسا سنی بوردا ییه جیم.

بالتاچی ناچار دورور بالتاسینان وورور آسلانین باشیندان. بالتا آسلانین باشینی یاریر و قان آسلانی گؤتورو. کیشی قورخور و دوروب قاچیر.

نئچه ایل بو ایشدن کئچیر و کیشی آسلانی داها مشه ده گؤرمور.

تا بیر  گون بالتاچی مشه ده آسلانی بی داها  گؤرور. بیر آز قورخور.

آسلان بالتاچی یا یاخینلاشیر و سوروشور

 ندن قورخورسان؟

کیشی دئییر:

 آخی سنین باشینی یارمیشدیم.

آسلان دئییر:

 گل باخ گؤر باشیمدا یارانین یئری قالیر می؟

کیشی باخیر گؤرور ائله بیل باشی هئچ یارالانماییب.

آسلان دئییر:

 او بالتا یاراسی ایدی توختادی. آنجاق سنین منه دئدیغین سؤزون یاراسی هله قلبیمدن سیلینمه ییبدر.

دئییر بیر گون حضرت موسی بیر اوغلانی گؤرور آناسینی آلیب بئلینه آپاریر

موسی اوغلانا دئییر آی بالا آنانی نیه اره وئرمیرسن؟

اوغلان دئیر، ای آللهین ائلچی سی بو نون اره گئدن واقتی اؤتوب، بو نئجه

اره گئده بیلر

ار بونون نه یینی آلسین

اوردان قاری چلیی ایله  وورار اوغلانین تپه سیندن دئیر یئتیم سن چوخ

بیلنسن یوخسا موسی؟؟؟

هله داستان بوردا بیتمیر

آناسی هر گون اوغلانا دئییر کی گل موسا نین سؤزونو یئره سالما

آللها خوش گئتمز. گل پیغمبرین بیر سؤزونو ایکی ائله مه

بالا مه یازیغین گلسین

آی سنی گؤرم سوبای اؤلمه یه سن

آخیر اوغلان جانا گلیر. آناسینا دئییر

آی آنا من سنی اره وئره رم. آنجاق بیر شرطی وار

آناسی دئییر نه شرطی

اوغلان دئییر: باخ من سنه ۱۰۰ دانا جویز وئره جیم. اگر اونلاری دیشلرینله

سیندیرا بیلسن اوندا منیم سؤزوم یوخدو

آناسی ناچار قبول ائدیر. اوغلان آناسینا ۱۰۰ دانا گئر جویز( قابغی چوخ برک

اولان جویز) وئریب گئدیر

آناسی جویزلرین بیرین سالیر دیشسیز آغزینا و آخشامادک گمیریر

آخشام اوغلان ائوه گلیب آناسیندان سوروشور نئچه سنی سیندیرمیسان؟

آناسی چوخ اومودلو سسله دئییر

بونو سیندیرسام قالار ۹۹ دانا سی

نئچه گون بوندان قاباق، گئتمیشدیم تراشکارین ایش توکانینا. گئتمیشدیم کی یانیندا دوروب و ایشینه کؤمک ائله ییم، بلکه من دئین ایشی تئز بیتیرسین.

تراشکار سحر چؤرح یئمه میشدی. ناهارا آز قالیردی. مندن سوروشدو سن ناهار یئمیسن؟ منده یالاندان جواب وئردیم: بلی  یئمیشم. باشلادیق ایشه. بیر ایکی ساعات اؤتدو. تراشکار بیر سیگار آلیشدیریب دئدی من بیر سئرچه وورموشام. دوکانینین یانی بیر حیط ایدی کی چوخلو مو آغاجلاری وارایدی. سئرچه لر ده گلیب اوزوملرین یئیردیلر. تراشکار سئرچه لرین بیرینی قوش توپانچاسیلا ووروب دریسینی سویموشدو.

گتیریب پیک نیک ده پیشیردی و بیر سئرچه نی ایکی کیشی یئدی ناهار یئرینه

سونرادا آخشامادک ایشله دیک.

بو گون بو شعری اوخودوم نوصرت کسمنلی دن.

اؤزومه آجیغیم گلدی.

ایكی سئرچه ....

تئلئقراف تئلینده ایكی سئرچه،

بیری سن، بیری من

یووامیزدا ایكی كؤرپه،

..... ایكی میــــزین.....

یاشاییریق بئله جه ....

ظالیم كئشیك چی سی اولان

بیر زمی بوغدامیز ،

فیكیر ائله مه، عؤمـــــــروم _ گونـــــــوم !

بویویه جك بالالاریمیز ! .

بیر بوداق دا ایكی سئرچه ،

بیری سن بیری من

آغاجین كؤكونده بالتا سسی ،

بوداقلاریندا یارپاقلارین

               قورخولو تیتره مه سی ،

یووامیزدا مئشه زیلزیله سی .

بیزی آختاران اووچو گولـله سی

               هله كی یان كئچیر،

گولـله لر گؤیرچین لری ،

توراجلاری، ككلیك لری سئچیر .

بیزه ده دیه بیلردی

              اونلار اولماسا.....

نووبه بیزه چاتاجاق

             مئشه ده یاغلی قوشلار قالماسا.....

بیر بولاقدا ایكی سئرچه

بیری سن، بیری من.

سو ایچیب گؤیلره باخیریق ،

عؤمور ایسته ییریك ایلاهی دن،

بالالاریمیز اوچانا قدر ،

باغا ، بوستانا ،

                آیاق آچانا قدر.....

مئشه ده بیر آج تولكو،

آغزیندا سئرچه توكو

               ائله بیل دیشلری

              قانادلانیب اوچماق ایسته ییر .

تئلئقراف تئللرینده كی،

بوداقلارداكی،

كوْل- كوْسدان اوزاقلارداكی

اوچان تیكه نی توتماق ایسته ییر .

بیز توكلری تولكو دیشینده قالان

              سئرچه لرین جسدی ییك

تولكولرین اوچان حسرتی ییك.....

بیر ائیواندا ایكی سئرچه،

بیری ســــــن، بیری مــــــــن....

سیغینمیشیق یووامیزا،

گئدك یئم دالینجا

دن گتیرن یوخدور بیزه .

سن خیرمانا...

من دییرمانا.....

دییرمان داشلاری اووولوب،

دن گتیرنلر چوخدان قووولوب .

تكجه سویو دئییل،

دنی ده سوْوولوب دییرمانلارین .

گئده جك باشقا یئریمیز یوخدور،

گؤرورم هاوا سوْیوقدور،

اوج ، مـــــــله ییـــــــم منیم .

بالالارین دیمدییینده

             بیر شئی قالماییب

           ساری دان باشقا .

یوخولاریندا هئچ نه گؤرمه ییرلر

                      داری دان باشـــقا !!

بیر شئی گتیره بیلمه سك

هئچ اولماسا بیر اووچونون آج بالالارینا یئم اولاق .

من گئدیم ، سن گلمه ،

بالالاردان گؤز-قولاق اول ، گؤز-قولاق....

گؤی اوزونده ایكی سئرچه !

بیـــــری ســــــــن ، بیـری مــن !!

گلمه گؤزلیم ، گلمه !!!

گولـله آچیلسا بیردن ،

بیر تاوادا ایكی سئرچه پیشه جك ،

بیری مــــن ،

بیــــــری....سن

من پوللاریمی بانکا قویمارام، چونکو بیلیرم قویدوغوم پوللاری آپاریب باشقا یئرلرده ایشله دیرلر و ...

آما نئچه ایل اولار جوانان خیر آدیندا بیر موسسه وار، چوخ گؤزل چالیشیر و بیزیم شهرده چوخلاری اوردان وام گؤتوروب و ایشلرین یولا سالیبلار.  منده پوللاریمی گتیردیم قویدوم بو بانکا، بلکه بیر نفرین دردینه دیدی.

سون گونلرده دفترچه مه باخدیم گؤردوم ۱۱۰ مین تومن پول وار ایچینده. بیر آز پولسوزلامیشدیم. دئدیم گئدیم ۱۰۰ مین تومنین گؤتوروم سورا قایتارارام یئرنه.

سحر ساهات ۹ دا قوندوم بانکا، چوخ شولوق اولدوغونا گؤره دوردوم سیرایا. مندن قاباق نئچه کیشی سیرادا دورموشدو. آز سونرا بیر کیشی گلدی و سون سیرادا اولانی سوروشدو، دوندوم گؤردوم چوخ تانیش دی. بلی ...

بو کیشی منه بیر آز پول بورجو وار ایدی. دئمک لاب آز ۴۰ مین بورجو اولاجاقمیش. منی گؤردو هویوخدو.

دئدی قارداش سنه بورجوم وار ایدی ، ایندی یاخجی اولدو سنی گؤردوم. دئ نئچه بورجوم وار وئره ییم.

چوخ تعاروف ائله یندن سونرا، منده ایسته مه دیم پوللارین آلام. دئدیم ۱۸ مین، اودا سئوینجک چیخاریب وئردی.

حتما دئیه جک سیز سن چوخ پاپاخ آدامسان!!!!

۱۸ مین آلدیم. سیرا چاتدی منه، بانکچی دئدی سنین حسابیندا ۱۰ مین وار

ائله دارالدیم کی گل گؤره سن

تانری منیم اوره ییمین باجاسیندان

شال ساللادی بو گئجه

اودا مندن پای دیله دی بئله جه

منیم واریم : بیر سن ایدین بیر اؤزوم

سنی وئرسم چیلدیراجام دوشوندوم

سنه یانقی ، سنه توتقون ، سنه سوسوز

سنه آجام دوشوندم

تانری ائدی بو سئوگییه تاماشا

من اؤزومو وئردیم گئتدی

سن یاشا

علی داشقین

اؤزوندن موغایات اول

بو اوچ سؤزجویون ایچینده گیزلر وار

اوزوندن موغایات اول، چونکو بوندان سونرا من یانیندا اولمایاجاغام، اولامیاجاغام دا، ایسته سم ده ایسته مسم ده. سئودیم بیر زامانلار سنی، هله ده سئویرم. مندن سونرا دا موتلو قالماغینی ایستیرم. اولوردا بیرگون سنه بیر داها دؤنسم سنی ساغ ایستیرم اونا گؤه اؤزوندن موغایات اول

اؤزوندن موغایات اول، چونکو بوندان سونرا اؤزوندن باشقاسی اولمایاجاق یانیندا، اؤزوندن موغایات اول و منی دوشونمه، چونکو من داها سنی دوشونمه یه جیم